ýeňil

1) Agyr däl, agramy az bolan, agyr bolmadyk.

∙ Ýeňil mineral.

2) Köp zähmet sarp edilmeýän, kyn bolmadyk, aňsat, sada, ýönekeý, ýeňil-ýelpaý.

∙ Iki golsuz, bir aýaksyz adamyny basmagyň bolsa, duşmana has hem ýeňil düşjegini bilýärin. (A. Gowşudow, Mähri-Wepa)

∙ Bu meseläni çykarmak örän ýeňil.

3) Göçme manyda Agras däl, salykatsyz, kelpeň, göterim (adam hakda).

∙ Ýeňil adam.

∙ Ýeňil häsiýet.

4) Göçme manyda Siňmesi aňsat bolan, az hümmetli (nahar hakda).

∙ Ýeňil nahar iýmek. Ýeňil nahar edinip, kino gitdik.

5) Göçme manyda Galyň däl, ýuka.

∙ Adamlar agyr gyş geýimlerini çykaryp, ýeňil ýaz geýimini geýýärdiler. (M. Ibrahimow, Ol gün geler)

◊ eli ýeňil — seret el

◊ kellesi ýeňil — seret ýeňilkelle

∙ Kellesi ýeňil adam.

◊ ökjesi ýeňil — seret ökje

∙ Ökjesi ýeňil adam.

◊ süňňi ýeňil — seret süňňi

∙ Süňňi ýeňil hojaýynyň özi şu günki ýaly gözümiň öňünde. (A. S. Puşkin, Saýlanan eserler)

◊ ýeňil atletika — seret atletika

◊ ýeňil galmak — Çalasynlyk bilen ýeriňden turmak, ýeňil hereket etmek.

∙ Şol wagt Wepa hoş gylawlyk bilen ýerinden ýeňil galdy. (A. Gowşudow, Mähri-Wepa)

◊ ýeňil maşyn — seret maşyn

∙ Ýeňil maşyn tüweleý turzup ýola düşdi. (A. Gowşudow, Köpetdagyň eteginde)

◊ ýeňil ýaralanmak — Çala ýaralanmak, howpsuz ýara düşmek.

∙ Emma Dantes elinden ýeňil ýaralanýar. («Edebiýat»)